Lygilegt langlífi systkina - 818 ára gömul

Elstu systkini í heimi eru samanlagt yfir 800 ára gömul og búa þau á eyjunni Sardiníu.

Systkinin eru níu talsins og voru nýlega skráð í heimsmetabók Guinness sem elstu systkini í heiminum. Ef aldur þeirra allra er lagður saman nær hann 818 árum, takk fyrir.

Elsta systirin er 104 ára gömul og svo koma þau koll af kolli. 99 ára, 97, 93, 91, 89, 86 81, og sú yngsta í systkinahópnum er ekki nema 78 ára.

Luca Deiana, prófessor við háskólann í borginni Sassari í Sardiníu segir að langlífi systkinana sé með ólíkindum. Vissulega sé langlífi ættgengt og í genum fjölskyldunnar en þó sé líklegt að aðrir þættir spili inn í þennan háa aldur. Til að mynda landslagið á eyjunni og ávextir sem eyjaskeggjar hafa ræktað í áratugi, sérstaklega perurnar og sveskjurnar.

Langlífi er töluvert algengt á eyjunni því af hverjum 100 þúsund íbúm eru 22 eldri en 100 ára.

Þrátt fyrir að vera orðin svona gömul þá eru þau flest öll í góðu formi, bæði líkamlega og andlega. Til dæmis rekur bróðirinn sem er 89 ára krá í heimabæ sínum og sú sem er 99 ára sækir messu í hverri viku.

Ef afkomendur systkinanna fá sömu gen og þau sjálf má reikna með að þau komi til með að ná álíka háum aldri. Að minnsta kosti ætti að vera nóg af einstaklingum til að erfa langlífið því sú elsta í hópnum, þessi sem er 104 ára, á níu börn, 24 barnabörn og 25 barnabarnabörn.