Fundu milljónir svarthola

Vísindamenn fundu nýlega milljónir tröllaukinna svarthola með hjálp stjörnusjónaukans Wise. Fundurinn mun gagnast í leitinni að svörum um hvernig vetrarbrautir og svarthol myndast.

Stjörnusjónaukinn Wise veitir geimvísindamönnum áður óþekkt sjónarhorn á alheiminn, enda skynjar hann ljós á öðru tíðnissviði en mannsaugað greinir. Því gerir hann vísindamönnum kleift að sjá hluti sem ekki hafa sést fyrr, m.a. einhverja björtustu hluta alheimsins.

Vitað er að stórar vetrarbrautir hafa gjarna risavaxið svarthol í miðjunni. Hvernig á þessu stendur eða hvernig þetta gerist hefur ekki fengist útskýrt. Stjörnusjónaukinn Wise virðist geta veitt svör við þessu og á fréttavef BBC kemur fram að myndir úr honum hafi þegar komið vísindamönnum á óvart.