Lynch á Skype í Gamla bíói

„Þessi samkoma er fyrir alla þá sem hafa áhuga á innhverfri íhugun eða hafa lært hana," segir Sigurjón Sighvatsson, kvikmyndaframleiðandi, um dagskrá um innhverfa íhugun í Gamla bíói.

„Þessi samkoma er fyrir alla þá sem hafa áhuga á innhverfri íhugun eða hafa lært hana," segir Sigurjón Sighvatsson, kvikmyndaframleiðandi, um dagskrá um innhverfa íhugun í Gamla bíói í kvöld þar sem David Lynch ávarpar viðstadda í gegnum samskiptaforitið Skype.

Fyrir þremur árum kom kvikmyndaleikstjórinn David Lynch hingað til lands í þeim tilgangi að kynna innhverfa íhugun fyrir Íslendingum í kjölfar bankahrunsins. „David hafði lofað mér að koma til Íslands fyrir 20 árum. Árið 2009 var ég að tala við hann í síma héðan og hann ákvað að koma við í Evrópuferð sinni sem var í vikunni á eftir," segir Sigurjón.

Lynch staldraði aðeins við í tvo daga, en hélt þó vel sóttan fyrirlestur í Háskólabíói um innhverfa íhugun. „David vildi bjóða Íslendingum aðstoð við að leita inn á við og takast þannig á við stressið sem fylgdi hruninu," segir Sigurjón.

Í kjölfar heimsóknar hans hafa um 1.400 manns lært innhverfa íhugun á námskeiðum Íslenska íhugunarfélagsins en David Lynch stofnunin styrkti formlegra starfsemi þess hérlendis um 25 milljónir. Innhverf íhugun er sérstök tegund af hugleiðslu sem Maharishi Mahesh Yogi þróaði og stílaði inn á fólk í Vesturheimi sem ætti oft erfitt með að komast í hið hefðbundna hugleiðsluástand en samkvæmt Sigurjóni stundar hana fólk úr öllum stéttum þjóðfélagsins. -trs