Ljón í Essex

Lögreglan í Essex í Bretlandi leitar nú að ljóni sem talið er vera á svæðinu. Vopnaðir lögreglumenn leituðu að kattardýrinu í nótt en tvær þyrlu aðstoðuðu við leitina. Tilkynnt var um dýrið í gær en í fyrstu var talið að um gabb væri að ræða.

Lögreglan í Essex hefur hins vegar gefið út að ljón sé sannarlega laust á svæðinu. Nú þegar hafa nokkrir íbúar náð myndum af dýrinu. Sérfræðingar frá dýragarðinum í Colchester segja myndirnar vera ósviknar.

Sérfræðingarnir hafa þó ekki getað varpað ljósi á hvaðan dýrið komi en öll ljón eru á sínum stað í dýragarðinum. Þá rannsakar lögreglan nú ábendingar um að ljónið hafi sloppið úr sirkus sem var í Essex fyrr í vikunni. Samkvæmt frétt Sky um málið kemur fram að ólíklegt sé að ljónið hafi verið á vegum fjöllleikahússins, enda eru engin ljón í sýningu þess.

Málið hefur vakið óhug á svæðinu enda er Essex vinsæll áningarstaður ferðamanna. Lögreglan hefur beðið íbúa svæðisins að vera á varðbergi enda er mikil hætta talin stafa af dýrinu. Að mati dýragarðsvarðanna er ljónið stórt og mögulega hungrað.

Dave Sparks, kráareigandi í Essex, sagði í samtali við breska ríkisútvarpið í gærkvöld að það væri í raun fjarstæðukennt að vita til þess að stærðarinn ljón væri á vappi í bænum.