Lagerbäck: Þetta eru fyrstu skrefin

Lars Lagerbäck krefst þess að íslenska A-landsliðið í fótbolta geri fá mistök í vináttulandsleiknum gegn Svartfjallalandi í dag sem fram fer á Pod Goricom-leikvanginum í Podgorica. Þetta er annar leikur Íslands undir stjórn sænska þjálfarans, en Ísland tapaði 3-1 gegn Japan síðastliðinn föstudag í Osaka. Ísland stillir upp alveg nýju liði frá því í leiknum gegn Japan og er landsliðsþjálfarinn vongóður um að ná að leggja Svartfjallaland að velli.

Ísland og Svartfjallaland hafa aldrei áður mæst í landsleik, hvorki í A-landsliðum né yngri landsliðum. Í Svartfjallalandi búa aðeins um 650.000 manns en árangur karlalandsliðsins í fótbolta hefur vakið athygli.

Liðið endaði í 2. sæti í sínum riðli á eftir Englandi í undankeppni Evrópumótsins.

Tékkar höfðu betur í umspili gegn Svartfellingum um laust sæti í úrslitum EM sem fram fer í sumar í Póllandi og Úkraínu.

„Ég vonast til þess að við náum að leika vel og það er mikilvægast að landa sigri," sagði Lars Lagerbäck í gær við íþróttadeild 365 þegar hann var spurður að því hvaða væntingar hann hefði fyrir leikinn í dag.

„Það er líka mikilvægt fyrir mig að fá að umgangast leikmennina á æfingum og fá að kynnast þeim betur. Ég hafði bara hitt um 1/3 af leikmannahópnum áður en við komum til Svartfjallalands," sagði Lars en hann er með alveg nýtt lið í höndunum frá því í leiknum gegn Japan.

Þar fékk Ísland á sig mark eftir aðeins 90 sekúndur. Landsliðsþjálfarinn hefur lagt mikla áherslu á að liðið þurfi að fækka mistökunum sem gerð eru í varnarleiknum.

„Við þurfum að byrja leikinn gegn Svartfjallalandi betur en við gerðum gegn Japan. Það er eitt af lykilatriðunum hjá okkur. Á móti Japan lékum við ekki vel fyrstu 25 mínúturnar en eftir það fóru hlutirnir að lagast. Að mínu mati vorum við á sama plani og Japan og náðum að skapa okkur færi. Við fengum á okkur tvö mjög ódýr mörk gegn Japan og það má ekki gerast þegar leikið er gegn liðum í þessum styrkleika."

Eins og gengur og gerist eru margir leikmenn enn að jafna sig eftir átökin með sínum félagsliðum um síðastliðna helgi og þar kemur nafn Arons Einars Gunnarssonar, leikmanns Cardiff, fyrst upp hjá landsliðsþjálfaranum. Aron lék í 120 mínútur í framlengdum úrslitaleik enska deildabikarsins á Wembley síðasta sunnudag þar sem Liverpool hafði betur eftir vítaspyrnukeppni.

„Það eru flestir leikmenn klárir í leikinn. Aron hefur ekki æft frá hann lék í 120 mínútur á Wembley. Það eru nokkrir sem eru þreyttir eftir leiki helgarinnar. Það á ekki að vera vandamál fyrir þá að spila gegn Svartfjallalandi. Ég hef trú á því að þeir geti allir lagt eitthvað af mörkum.

Það er frábært að fá þessa tvo leiki, ekki síst fyrir mig. Ég fæ tækifæri til þess að kynnast leikmönnum liðsins. Það má orða það þannig að með þessum leikjum séum við að taka fyrstu skrefin."

Eigum við möguleika á að vinna Svartfjallaland? „Já, ég hef trú því," sagði Lars Lagerbäck.