Fátækum fer fjölgandi í Danmörku

Fátækum fjölgaði í Danmörku á árunum 2002 og fram til 2010. Hlutfallslega fjölgaði þeim mest á Sjálandi og í höfuðborginni Kaupmannahöfn.

Þetta kemur fram í nýrri rannsókn á vegum dönsku verkalýðshreyfingarinnar sem kynnt verður í dag. Notaðar eru tölur OECD um fátækramörk en þau nema tæpum 8.800 dönskum króna eða um 190 þúsund krónum fyrir einstakling og rúmlega 5.000 dönskum krónum fyrir hvern einstakling í fjögurra manna fjölskyldu. Alls lifa um 250.000 Danir undir þessum mörkum.

Mest hefur fátækum fjölgað, eða yfir 3% í nokkrum úthverfum Kaupmannahafnar eins og Bröndby, Albertslund og Ishöj. Í miðborg Kaupmannahafnar er fjölgunin hinsvegar tæp 3%.

Í öðrum landshlutum er staðan betri. Í Óðinsvéum á Fjóni nemur fjölgunin þannig innan við 2% og á Langalandi er hún innan við 1% svo dæmi séu tekin.