Arafat verður grafinn upp

Hópur franskra réttarmeinafræðinga heldur á næstu dögum til Ramallah á Vesturbakkanum í því skyni að grafa upp lík Jassers Arafats, sem lengi var helsti leiðtogi Palestínumanna.

Þetta fullyrðir ekkja Arafats og segist vonast til þess að þar með fáist skýring á dauða hans.

Banamein Arafats var heilablóðfall, en aldrei fékkst skýring á veikindum þeim sem hrjáðu hann síðustu vikurnar áður en hann dó í nóvember 2004.

Í síðasta mánuði sögðu svissneskir vísindamenn að leifar af pólon 210, geislavirku efni, hefði fundist á fötum hans. - gb