Engin Margrét Lára og Katrín tæp

Íslenska kvennalandsliðið í fótbolta er í lykilstöðu fyrir lokaleiki sína í undankeppni Evrópumótsins í Svíþjóð 2013. Staðan á toppi riðilsins er vissulega góð en landsliðsþjálfarinn Sigurður Ragnar Eyjólfsson þarf hugsanlega að fara í síðustu tvo leikina án tveggja af allra mikilvægustu leikmönnum liðsins.

Sigurður Ragnar tilkynnti í gær 22 manna hóp fyrir leikina tvo á móti Norður-Írlandi á Laugardalsvelli 15. september og á móti Noregi á Ulleval fjórum dögum síðar. Sigur á Norður-Írum tryggir sæti í umspili og þá bíður liðsins úrslitaleikur við Norðmenn um sæti í úrslitakeppni EM.

Það brá samt örugglega mörgum þegar engin Margrét Lára Viðarsdóttir var á listanum og ekki batnaði ástandið þegar þjálfarinn ræddi þann möguleika að liðið yrði kannski líka án fyrirliðans Katrínar Jónsdóttur.

Sigurður Ragnar var þó hvergi banginn þegar hann ræddi við blaðamenn í gær og hóf fundinn á því að ræða ungu stelpurnar en fimm 17 og 18 ára stelpur er í hópnum að þessu sinni.

„Það kemur kannski á óvart að það eru margir ungir leikmenn í hópnum en það eru allt leikmenn sem hafa staðið sig mjög vel í Pepsi-deildinni. Það eru spennandi leikmenn að koma upp," sagði Sigurður Ragnar. Sandra María Jessen og Elín Metta Jensen eru báðar fæddar 1995 en samt búnar að skora 17 og 16 mörk í Pepsi-deildinni í sumar. Það má búast við að önnur þeirra fái að spila því liðið þarf á markaskorara að halda.

Enginn má vera ómissandi„Auðvitað vildum við hafa Margréti Láru, okkar aðalmarkaskorara, og Katrínu, fyrirliðann okkar í hjarta varnarinnar. Það verður að vera þannig að enginn sé ómissandi og við verðum að þróa liðið okkar þannig að enginn sé ómissandi," sagði Sigurður Ragnar.

Margrét Lára ætlaði að koma af krafti inn í haust eftir að hafa hvílt sig á fótboltaæfingum í allt sumar.

„Hún var í sumar að hreyfa sig í annarri hreyfingu heldur en fótbolta. Hún var að hjóla mikið, synda og styrkja sig. Við vonuðumst til að hún myndi ná sér af þessum meiðslum og verða betri. Hún fór síðan til Kristianstad og markmiðið hennar var að spila á móti Malmö. Hún fór á tvær knattspyrnuæfingar fyrir þann leik og fékk mjög slæm einkenni aftur og þau sömu og hún var að finna fyrir í upphafi sumars og hefur verið að finna fyrir undanfarin ár," sagði Sigurður Ragnar og bætti við:

Margrét Lára á leið í aðgerð„Þetta er búið að vera mjög erfitt fyrir hana í langan tíma en samt er ótrúlegt hvað hún hefur náð að spila þrátt fyrir þessi meiðsli. Hún var markahæst í Svíþjóð með þessi meiðsli og spilaði fyrir Potsdam, eitt besta félagslið í Evrópu, með þessi meiðsli.

Maður getur bara ímyndað sér hvernig hún verður ef hún nær sér góðri af þessum meiðslum sem hún vonandi gerir. Hún ætlar að leita sér frekari lækninga og jafnvel fara í aðgerð," sagði Sigurður Ragnar og það er líka mikil óvissa með fyrirliðann.

„Þetta eru gríðarlega mikilvægir leikir fyrir okkur og Katrín er fyrirliðinn okkar. Hún spilar líka stöðu sem við erum ekki með mikla breidd í. Við höldum henni inni og vonum það besta. Katrín tognaði aftan í læri 4. júlí og hún hefur ekki spilað leik síðan. Hún hefur verið að æfa og halda sér í formi og smátt og smátt hefur hún verið að skána," sagði Sigurður Ragnar.

Ferskir straumar inn í liðiðSigurður Ragnar kallar nú á fimm mjög unga leikmenn fyrir afar mikilvæga landsleiki.

„Fjórar af þessum leikmönnum fóru mjög langt með 17 ára landsliðinu í Evrópukeppninni eða alla leið í undanúrslitin. Þær eru vanar að ná árangri og eru mjög metnaðarfullar. Þær koma kannski með ferska strauma inn í landsliðið.

Ég held að við munum sjá einhverjar þeirra í öðrum eða jafnvel báðum leikjunum. Það er bara að fjölmenna á völlinn og sjá ungu og efnilegu stelpurnar okkar og svo allar hinar sem eru orðnar svo góðar," sagði Sigurður Ragnar að lokum.