Of seint að tala um umbætur

„Það er of seint að tala um umbætur, nú er tími kominn á breytingar,“ sagði Mohammed Morsi, forseti Egyptalands, um ástandið í Sýrlandi, þar sem Bashar al Assad forseti reynir enn að berja niður uppreisn. Morsi segir að Assad ætti að draga lærdóm af nýlegri sögu, og vísaði þar til byltinga víða í arabaheiminum.

Recep Tayyip Erdogan, forsætisráðherra Tyrklands, tók enn dýpra í árinni og sagði Sýrlandsstjórn vera orðna að hryðjuverkastjórn: „Sýrland er að ganga í gegnum mikla mannúðarharmsögu. Eins og venjulega gerir alþjóðasamfélagið því miður ekkert annað en að horfa upp á slátrunina, fjöldamorðin og útrýmingu múslima.“

Tyrkneska stjórnin hefur verið meðal hörðustu gagnrýnenda Sýrlandsstjórnar allar götur síðan mótmæli og uppreisn hófust í landinu snemma á síðasta ári.

Pattstaða virðist ríkja í borgarastríðinu í Sýrlandi. Hvorki uppreisnarherinn né stjórnarherinn hafa náð yfirhöndinni, en berjast af hörku í helstu borgum landsins með þeim afleiðingum að átökin hafa kostað vel á þriðja tug þúsunda lífið. - gb