Sprenging í tyrknesku vopnabúri kostaði 25 hermenn lífið

Mikil sprenging sem varð í vopnabúri tyrkneska hersins í héraðinu Afyon í nótt kostaði 25 hermenn lífið og fjórir liggja særðir á hersjúkrahúsi í grenndinni.

Einn af ráðherrum tyrknesku stjórnarinnar segir að sennilega hafi verið um óhapp að ræða en ekki hryðjuverk.

Mikill eldur blossaði upp í kjölfar sprengingarinnar og talið er að hluti af þeim sem létu lífið hafi verið fastir inni í byggingunni meðan slökkviliðsmenn börðust við eldinn.

Slökkviliðsmenn áttu í miklum erfiðleikum með að ná til hermannanna þar sem handsprengjur lágu eins og hráviði um allt á svæðinu.