Svefntruflanir gætu verið fyrirboði Alzheimer sjúkdómsins

Ný rannsókn sýnir að svefntruflanir hjá fullorðnu fólki gæti verið merki um að viðkomandi sé með Alzheimer á fyrstu stigum sjúkdómsins.

Rannsókn þessi sem gerð var á músum sýnir að þegar ákveðið prótein fer að byggjast upp í heila músanna fá þær svefntruflanir. Talið er að myndun þessa próteins sé undanfari Alzheimers sjúkdómsins í fólki.

Í umfjöllun um málið á BBC segir að ef hægt sé að sanna tengslin þarna á milli gæti það orðið læknum mjög gagnlegt í baráttu þeirra við Alzheimer. Það er talið lykilatriði fyrir lækna að geta greint Alzheimer á frumstigi til að geta læknað þennan sjúkdóm.

Hingað til hefur aðeins verið hægt að greina Alzheimer hjá eldra fólki á seinni stigum í þróun sjúkdómsins. Þá er heili viðkomandi sjúklings yfirleitt orðinn svo illa farinn að sjúkdómurinn telst nær ólæknandi.

Sérfræðingar segja að gera verði meiri rannsóknir á fólki hvað fyrrgreint prótein varðar því ekki sé víst að fólk bregðist við aukningu á því í heila sínum á sama hátt og mýs.