Lufthansa aflýsir um 1200 flugum

Flugfélagið Lufthansa í Þýskalandi neyðist til að aflýsa um 1.200 flugum nú um helgina vegna verkfalls flugliða. Verkfallið gæti bitnað á yfir hundrað þúsund farþegum.

Verkfallið mun standa í 24 klukkustundir og mun valda töfum fram yfir helgi. Það mun hafa áhrif á sex flugvelli í Þýskalandi, m.a. flugvellina í Berlin og Frankfurt. Ekki er útilokað að verkfallið hafi áhrif á farþega hjá öðrum flugfélögum.

Flugliðar Lufthansa fara fram á 5% launahækkun og halda því fram að þeir hafi engar launahækkanir fengið í þrjú ár. Þeir fara einnig fram á tryggingu fyrir að félagið reki ekki starfsfólk til að ráða tímabundna starfsmenn inn á lægri launum.

Þetta verður þriðja verkfall flugliða Lufthansa. Fyrsta verkfallið var í lok síðustu viku en það síðara var á þriðjudaginn var og bitnaði á yfir 43 þúsund manns. Einhverjir töfðust yfir nótt og þurftu að sofa á flugvellinum á bráðabirgðarúmum eins og sést á myndinni hér að ofan. Óttast er að verkfallið núna muni bitna á töluvert fleirum.



BBC segir frá.