Skoskur fiskimaður fann elsta flöskuskeyti sem vitað er um

Skoskur fiskimaður er kominn í Heimsmetabók Guiness fyrir að hafa fundið elsta flöskuskeyti sem vitað er um í heiminum.

Fiskimaður þessi, Andrew Leaper að nafni var á veiðum undan ströndum Hjaltlandseyja þegar hann fékk flöskuskeytið í veiðarfæri sín í sumar. Flöskuskeytið er orðið 98 ára gamalt.

Innihald þess var hinsvegar nokkuð ólíkt því sem gengur og gerist með slík skeyti. Í flöskunni var póstkort sem lofaði þeim sem fyndi það sex pensum í verðlaun fyrir að skila því til stýrimannaskólans í Glasgow.

Forsagan er að sumarið 1914 voru 1890 slík flöskuskeyti sett á flot af einum af kennurunum við skólann en markmiðið með þeim var að kanna hafstrauma undan ströndum Skotlands.

Andrew segir að það hafi verið mjög spennandi að finna þetta flöskuskeyti og hann hafi vart getað beðið með að opna það. Þegar innihaldið kom í ljós segir Andrew að honum hafi liðið eins og að hafa unnið tvöfaldan vinning í lottói.