Vísindakirkjan læknar fórnarlömb Agent Orange

Fórnarlömb efnavopna bandaríkjahers í Víetnamstríðinu á sjöunda áratugnum bíða nú eftir hreinsunarmeðferð í boði Vísindakirkjunnar. Eins og stendur liggja 24 fórnarlömb á spítalanum í Hanoi og bíða meðferðarinnar.

Vísindakirkju-menn nota svokallaða 'Hubbard aðferð' til að lækna alkóhólisma og fíkniefnafín. Aðferðin felur í sér gufuböð og vítamín. Vísindakirkjan opnaði miðstöð í New York borg eftir árásirnar á tvíburaturnana 11. september árið 2001 og bauð fólki sem mögulega hafði orðið fyrir eitrun upp á meðferð.

Vísindamenn leyfa sér að efast um að aðferðin geri nokkurt gagn og kalla hana platvísindi og skottulækningar.

Bandaríkjaher sleppti um 75 lítrum af eiturefnum, m.a. hinu svonefnda Agent Orange, yfir Víetnam í stríðinu til að þurrka út skóga sem víetnamskir hermenn leyndust í. Eiturefnin eru nú talin hafa valdið stökkbreytingum og alvarlegum fötlunum sem enn í dag koma fram í nýfæddum börnum á svæðinu.

„Ég vona að ég og konan mín læknumst endanlega í þessari meðferð," sagði Nguyen Dai Sang, sem bíður eftir meðferð Vísindakirkjunnar, í víetnömskum fjölmiðlum.

Talsmaður bandaríska sendiráðsins í Víetnam tekur sérstaklega fram að bandaríska ríkið standi ekki á bak við meðferð Vísindakirkjunnar og bætti við að stjórnvöld í Bandaríkjunum vissu ekki til þess að til væri nein árangursrík leið til að hreinsa eiturefnin úr líkömum fólks.

Þetta kom fram í breska blaðinu The Guardian í dag.