Weiwei segir Nóbelsverðlaunin í bókmenntum vera brjálæði

Hinn þekkti kínverski lista- og andófsmaður Ai Weiwei segir að það hafi verið brjálæði að veita kínverska rithöfundinum Mo Yan bókmenntaverðlaun Nóbels í ár.

Óhætt er að segja að ákvörðun sænsku Nóbelsnefndarinnar að veita Mo Yan verðlaunin hafi komið verulega á óvart enda var nafn hans hvergi að finna í vangaveltum sérfræðinga um hverjir myndu fá þessi virtu bókmenntaverðlaun í ár.

Danska blaðið Politiken ræðir við Ai Weiwei um málið en hann skilur hvorki upp né niður í ákvörðun Nóbelsnefndarinnar. Weiwei segir að fjöldi frambærilegra kínverskra rithöfunda vinni við mjög erfiðar aðstæður vegna ritskoðunar og hafi því ekki frið til að skapa bókmenntaverk sín. Þá sitji margir þeirra í fangelsum vegna skrifa sinna.

Weiwei segir að verðlaunaveitingin sýni að bókmenntaakademían sé ekki í neinum tengslum við raunveruleikann og að málið allt lykti af spillingu. Mo Yan hafi gætt þess að vera innan þeirra marka sem ritskoðun kínverskra stjórnvalda hefur sett honum.

Weiwei segir einnig að Nóbelsverðlaunin hefðu átt að fara til rithöfundar sem ber virðingu fyrir baráttu fólks fyrir mannréttindum og tjáningarfrelsi.