Bandaríkin lögðu Mexíkó í 25. tilraun

Leikmenn karlaliðs Bandaríkjanna fögnuðu 1-0 sigrinum á Mexíkó í gærkvöldi líkt og liðið hefði unnið stóran titil. Sigurinn var sá fyrsti á útivelli gegn erkifjendunum frá upphafi eða í 25 leikjum.

Michael Orozco skoraði eina mark leiksins á Azteca-leikvanginum á 80. mínútu í leik þar sem Bandaríkin vörðust grimmilega gegn sókndjörfum Mexíkómönnum.

„Þetta var frábær frammistaða alls liðsins. Að vinna hérna er mikið gleðiefni. Ég held að sigurinn sé afar þýðingarmikill fyrir stuðningsmenn Bandaríkjanna og liðið. Við vorum vel meðvitaðir um að okkur hafði aldrei tekist að vinna á Azteca-leikvanginum," sagði Jurgen Klinsmann landsliðsþjálfari Bandaríkjanna.

Mexíkó hafði unnið 23 viðureignir þjóðanna í Mexíkó en einum leik hafði lokið með jafntefli. Heimamenn áttu 19 skot á markið samanborið við sjö skot gestanna sem héldu boltanum mestan hluta leiksins.

Javier Hernandez, framherji Manchester United, komst nálægt því að jafna leikinn með fallegum skalla sem Tim Howard, besti maður vallarins, varði með tilþrifum. Vörsluna má sjá hér.