Smygluðu 9 tonnum af hassi með flutningabílum

Flutningafyrirtæki á Jótlandi telur sig illa brennt eftir að í ljós er komið að stórtækir hasssmyglarar notuðu flutningabíla þess til að smygla yfir níu tonnum af hassi frá Spáni til Danmerkur.

Hassinu var komið fyrir í húsgögnum og búslóðum sem flutningafyrirtækið flutti frá Malaga á Spáni til Danmerkur í 21 ferð en bílstjórar fyrirtækisins höfðu ekki hugmynd um þennan aukafarm sinn.

Búið er að handtaka höfuðpaurinn í þessu smyglmáli, sem og sambýliskonu hans, en á heimili þeirra fundust 2 milljónir í dönskum krónum og 1,7 milljón í evrum. Götuverðmæti hassins er talið vera hálfur milljarður danskra króna eða yfir 10 milljarðar króna.