Engin mótmæli vegna Ísaks

Vegna fellibylsins Ísaks urðu mótmælin sem skipulögð voru fyrir utan landsþing Repúblikanaflokksins í Tampa í Flórída aldrei að veruleika. Á landsþingi Demókrataflokksins í Charlotte sem hefst í þessari viku er hins vegar búist við miklum mótmælum.

Lögregluyfirvöld í Norður-Karólínu fylki eru að búa sig undir að þúsundir mótmælenda og aðgerðasinna komi saman í Charlotte vegna landsþingsins.

Aðgerðarsinnar hafa skipulagt sérstaka göngu á sunnudag til að mótmæla félagslegu óréttlæti og hárri skuldabyrði námsmanna, en stærsta fjármálamiðstöð Bandaríkjanna á eftir Wall Street er í Charlotte, þar sem margir stórbankar hafa höfuðstöðvar sínar.