Yfir 150 saknað eftir ferjuslys í Bangladesh

Fjölda manns er saknað eftir að ferja sökk á Meghna fljótinu í Bangladesh skammt frá Dhaka höfuðborg landsins í gærkvöldi.

Um 200 manns voru um borð í ferjunni þegar hún sökk en óstaðfestar fregnir herma að ferjan hafi lent í árekstri við lítið olíuflutningaskip á fljótinu.

Búið er að bjarga 35 af farþegunum sem voru um borð en yfir 150 manns er enn saknað.

Ferjuslys eru algeng í Bangladesh en þau verða yfirleitt vegna þess að ferjurnar sigla yfirhlaðnar af farþegum og öryggismál um borð í þeim eru í lamasessi.