Þjóðernissinnar flögguðu á Senkaku

Japanskir þjóðernissinnar tóku í gær land á umdeildum eyjaklasa í austur Kínahafi en Japanir deila hart við Kínverja um yfirráð yfir eyjunum.

Japanir fara með yfirráð yfir eyjunum sem þar í landi kallast Senkaku. Kínverjar kalla þær hinsvegar Diaoyu og krefjast yfirráða yfir þeim.

Að minnsta kosti tíu Japanir stukku frá borði þegar skipalest með um 200 þjóðernissinum sigldi til eyjanna í gær. Þeir syntu til lands og flögguðu japönskum fánum. Þeir voru síðan handteknir af japönsku strandgæslunni sem hafði áður neitað þeim um leyfi til að fara út í eyjarnar.

Uppátækið hefur vakið hörð viðbrögð hjá Kínverjum og hefur verið mótmælt við sendráð Japana í Kína. Eyjarnar eru óbyggðar en talið er að mikið jarðgas sé að finna undan ströndum þeirra.