Beiðni morðingja Lennons um reynslulausn tekin fyrir

Beiðni Mark David Chapman, sem skaut John Lennon til bana fyrir 32 árum, um reynslulausn verður tekin fyrir í sjöunda sinn núna í vikunnni.

Fangelsismálayfirvöld New York-fylkis tilkynntu um þetta í gær. Chapman, sem er nú 57 ára, hlaut 20 ára til lífstíðar fangelsisdóm fyrir að skjóta Lennon fjórum sinnum í bakið fyrir utan heimili hins síðarnefnda í New York hinn 8. desember 1980.

Hann játaði verknaðinn. Tilkynnt verður í lok vikunnar hvort erindi hans fái hljómgrunn hjá fangelsismálayfirvöldum en sérstök nefnd tekur ákvörðun í málinu að loknu viðtali við Chapman.