Dulbúnar boðflennur vöktu enga tortryggni

Talsmaður Isavia segir þrennt hafa brugðist þegar tveir laumufarþegar fundust í þotu á Keflavíkurflugvelli. Mennirnir hafi sést í eftirlitsmyndavélum en ekki vakið neinar grunsemdir því þeir hafi dulbúið sig sem flugvallarstarfsmenn.

öryggismál„Það er engum blöðum um það að fletta að þeir hefðu ekki átt að komast inn á svæðið,“ segir Friðþór Eydal, talsmaður Isavia, um það þegar tveir hælisleitendur komust inn í farþegaþotu á Keflavíkurflugvelli.

Eins og fram kom í Fréttablaðinu í gær virðist yfirlýsing Isavia frá því daginn eftir atvikið stangast á við niðurstöður Flugmálastjórnar um atburðinn. Isavia sagði ekkert athugavert við störf öryggisstarfsmanna sinna. Flugmálastjórn segir á hinn bóginn í minnisblaði til innanríkisráðuneytisins að eftirliti með aðgangi að vellinum, flughlaði og verndun farþegaþotunnar hafi verið ábótavant.

Aðspurður segir Friðþór Eydal skýringuna á misræminu sennilega þá að í yfirlýsingu Isavia hafi verið vísað til þess að öryggiskerfið í heild hafi ekki brugðist. Kerfið sé lagskipt og síðasti hlekkurinn hafi ekki brugðist því mennirnir hafi fundist við skoðun á vélinni fyrir brottför.

Að sögn Friðþórs urðu þrír samverkandi þættir til þess að hælisleitendurnir náðu alla leið inn í þotuna. Í fyrsta lagi hafi verktaki skilið eftir vinnupall sem auðveldaði að komast yfir öryggisgirðingu.

Þá bendir Friðþór á að ekki sé rétt sem fram komi í minnisblaði Flugmálastjórnar að mennirnir hafi ekki sést í eftirlitsmyndavélum. „Það varð náttúrulega vart við þá en þeir voru klæddir eins og hverjir aðrir flugvallarstarfsmenn þannig að það greinilega vakti ekki grunsemdir,“ segir hann.

Í þriðja lagi segir Friðþór að gert sé ráð fyrir því í reglum að flugvélar séu aldrei skildar eftir opnar og með aðgengi nema umráðamaður flugvélarinnar hafi við þær vakt. „Það gekk ekki eftir í þessu tilviki,“ segir hann.

Að sögn Friðþórs er allt ferli við öryggiskerfi flugvallarins tekið út og samþykkt af Flugmálastjórn. Hver og einn aðili á vellinum beri ábyrgð á sínum þætti og að kröfur séu uppfylltar. „Síðan tekur Flugmálstjórn það út reglulega,“ segir hann.

Isavia annast rekstur Keflavíkurflugvallar eins og annarra flugvalla á Íslandi. Friðþór segir að það sé hlutverk Isavia að annast flugvernd og í því felist meðal annars að sjá til þess að óboðnir gestir komist ekki inn á flugvallarsvæðið. „Það brást náttúrulega. Hefðu mennirnir ekki verið í dularklæðum eins og flugvallarstarfsmenn getur vel verið að þeir hefðu uppgötvast strax og það sást til þeirra,“ ítrekar talsmaður Isavia.gar@frettabladid.is