Arnar Grétarsson endurnýjar kynnin við Belgíu

Flest bendir til þess að Arnar Grétarsson verði ráðinn yfirmaður knattspyrnumála hjá belgíska félaginu Club Brugge. Viðræður Arnars við belgíska félagið eru á lokastigi samkvæmt öruggum heimildum Vísis.

Arnar gegndi sömu stöðu hjá gríska félaginu AEK í Aþenu í tvö ár eða allt þar til í sumar þegar allt fór í háaloft hjá félaginu vegna fjárhagserfiðleika. Á þeim tíma sem Arnar stýrði gangi mála hjá AEK gengu Elfar Freyr Helgason og Eiður Smári Guðjohnsen í raðir félagsins.

Arnar þekkir vel til í Belgíu. Þar spilaði hann með Lokeren árin 2000-2006 við afar góðan orðstí. Club Brugge situr í 3.-5. sæti belgísku deildarinnar með 35 stig eftir 20 umferðir.