Eiður Smári fékk rautt spjald í botnslagnum

Eiður Smári Guðjohnsen var rekinn af velli sjö mínútum fyrir leikslok þegar Cercle Brugge gerði 1-1 jafntefli á útivelli í kvöld á móti Lierse í botnslag í belgísku úrvalsdeildinni í fótbolta.

Eiður Smári fékk þá sitt annað gula spjald en fyrra gula spjaldið fékk hann aðeins tveimur mínútum fyrr. Cercle var 1-0 undir þegar Eiður Smári var rekinn útaf. Arnór Þór Viðarsson sat allan leikinn á bekknum hjá Cercle.

Lucas Van Eenoo tryggði Cercle Brugge 1-1 jafntefli þegar hann skoraði jöfnunarmarkið á 89. mínútu leiksins en liðið endaði með níu menn inn á vellinum eftir að Niels Mestdagh fékk sitt annað gula spjald í lokin. Rachid Bourabia kom Lierse yfir á fyrstu mínútu seinni hálfleiks.

Lierse er því áfram fjórum stigum á undan Cercle Brugge en liðin sitja í tveimur neðstu sætum deildarinnar og þurftu því nauðsynlega á öllum stigunum að halda í kvöld.