Glæsimark Guðlaugs Victors á móti toppliði PSV

Guðlaugur Victor Pálsson tryggði NEC Nijmegen 1-1 jafntefli á móti toppliði PSV Eindhoven í hollensku úrvalsdeildinni í fótbolta í kvöld þegar hann jafnaði leikinn tíu mínútum fyrir leikslok. Þetta var annað mark Guðlaugs Victors í 11 leikjum með NEC.

Jöfnunarmarkið var af glæsilegri gerðinni. Guðlaugur Victor fékk boltann fyrir utan teig, lék á einn varnarmann og inn í teiginn þar sem hann lét vaða og boltinn sigldi upp í fjærhornið algjörlega óverjandi fyrir markvörð PSV.

PSV er ennþá í efsta sæti deildarinnar en NEC er þrettán stigum neðar í sjöunda sætinu.

Það er hægt að sjá þetta frábæra mark Guðlaugs Victors hér fyrir neðan.