Villas Boas: Áttum sigurinn skilinn

Bæði Andre Villas-Boas stjóri Tottenham og Michael Laudrup þjálfari Swansea voru ánægðir með frammistöðu síns liðs þegar Tottenham vann viðureign liðanna 1-0 fyrr í dag.

„Þetta var góður, góður sigur og ég held að við höfum átt hann skilinn. Við gerðum allt rétt. Fengum svo mörg færi og hefðum átt að gera út um leikinn mun fyrr,“ sagði Andre Villas-Boas knattspyrnustjóri Tottenham eftir sigurinn á Swansea í dag.

„Við vorum einbeittir og skipulagðir í okkar leik og það hefði verið ósanngjarnt ef við hefðum ekki unnið.

„Swansea gerði okkur þetta erfitt fyrir. Þeir eru ekki bara góðir fram, vörnin þeirra er vel skipulögð. Það var erfitt að brjóta þá á bak aftur og við þurftum að vera þolinmóðir.

„Það er mikilvægt að ná aftur fjórða sætinu. Deildin er jöfn og það var gott að geta gefið áhorfendum á White Hart Lane góðan sigur,“ sagði Villas-Boas.

Michael Laudrup stjóri Swansea var ánægður með spilamennsku síns liðs þó liðið hafi farið frá White Hart Lane án stiga.

„Þetta var erfiður leikur gegn góðu liði. Við byrjuðum vel áður en þeir settu okkur undir mikla pressu,“ sagði Laudrup.

„Þeir eru með marga góða leikmenn og sköpuðu sér mörg góð færi en við vissum að ef það væri markalaust í hálfleik að við ættum góða möguleika.

„Þeir sköpuðu sér ekki mörg færi í seinni hálfleik en við vorum ekki upp á okkar besta sóknarlega. Það vantaði aðeins upp á en ég er ánægður með spilamennsku liðsins í heild,“ sagði Laudrup.