Erum ekki rasistar en viljum hvorki sjá svarta leikmenn né homma

Stuðningsmenn rússneska liðsins Zenit St. Petersburg segjast ekki vera rasistar en þeir vilja samt losna við alla svarta og rómanska leikmenn frá félaginu.

Stærstu stuðningsmannahópar félagsins hafa nú stofnað eitt stuðningsmannafélag sem stendur saman í því að losna við alla útlendinga hjá félaginu. Talsmenn samtakanna segjast hafa áhyggjur af því að félagið missi tengsl sín við borgina ef fram heldur sem horfir.

"Að losna við svarta leikmenn frá Zenit skiptir okkur máli út af hefðinni og engu öðru. Félagið þarf að halda ímynd sinni. Við erum langt fyrir norðan og höfum ekki sömu tengsl við Afríku og félög í öðrum löndum," segir meðal annars í yfirlýsingu frá stuðningsmannasamtökunum en þau eru ekkert sérstaklega hrifin af hommum heldur. Þeir vilja hvítt lið með engum hommum.

"Það er ekkert kynþáttaníð eða þjóðernishyggja í þessum skoðunum okkar. Félagið er bara að tapa einkennum sínum og það þykir okkur miður. Zenit er tákn borgarinnar og má ekki tapa ímynd sinni. Við viljum ekki sjá félagið verða að miðlungsliði í Evrópu sem er borið uppi af útlendingum."

Á meðal þeldökkra leikmanna félagsins er Brasilíumaðurinn Hulk. Stuðningsmenn félagsins létu hann vita af því hvað þeim finnst um hann er þeir sendu honum gervisprengju.