Alfreð klúðraði víti í vítaspyrnukeppni

Alfreð Finnbogason var í byrjunarliði Heerenveen í kvöld og lék allan leikinn er liðið tapaði gegn Feyenoord í hollenska bikarnum. Vítaspyrnukeppni þurfti til að fá úrslit.

Pelle kom Feyenoord yfir í fyrri hálfleik en Gouweleeuw jafnaði snemma í þeim síðari. Það var síðan Immers sem kom Feyenoord í 1-2 25 mínútum fyrir leikslok.

Það var flest sem benti til þess að Feyenoord myndi vinna leikinn er Duricic jafnaði leikinn fyrir Heerenveen í uppbótartíma og tryggði liðinu framlengingu.

Ekkert var skorað í framlengingunni og því þurfti að grípa til vítaspyrnukeppni. Hún var æsispennandi og þurfti bráðabana til að knýja fram úrslit. Alfreð tók fyrsta vítið í vítakeppninni en spyrna hans var misheppnuð.

Baráttu Heerenveen í bikarnum þetta árið er því lokið og liðið getur farið að einbeita sér að því að bjarga sæti sínu í hollensku úrvalsdeildinni.