Norður-Kórea undirbýr eldflaugaskot

Yfirvöld í Norður-Kóreu munu reyna að koma gervitungli á sporbraut um jörðu seinna í þessum mánuði.

Talið er að geimskotið muni eiga sér stað milli 10. og 22 desember. Fyrri geimskot Norður-Kóreu, sem hafa nær öll farið úr skorðum, hafa verið harðlega gagnrýnd af alþjóðsamfélaginu.

Því hefur verið haldið fram að eldflaugaskotin séu liður í að þróa langdræg kjarnavopn. Ráðamenn í Norður-Kóreu hafa þó ítrekað vísað því á bug.

Eldflaugaskotið mun að öllum líkindum auka enn á spennu á svæðinu. Þá kemur geimskotið einnig til með að hafa pólitískar afleiðingar í Suður-Kóreu en forsetakosningar fara þar fram þann 19. desember.

Síðasta geimskot Norður-Kóreu átti sér stað í apríl og endaði með ósköpum. Eldflaugin sprakk í loft upp eftir 90 sekúndna flug.