Ályktun um Palestínu til afgreiðslu

Ályktun um að Palestína fái stöðu áheyrnarríkis hjá Sameinuðu Þjóðunum er nú til afgreiðslu hjá allherjarþingi Sameinuðu Þjóðanna.

Umfjöllunin um ályktunina hófst uppúr klukkan átta í kvöld. Áður en atkvæði verða greidd verða flutt ávörp um ályktunina. Það er ekki gott að segja hve langan tíma ræðuhöld munu standa áður en atkvæði verða greidd en upplýsingafulltrúi íslenska utanríkisráðuneytisins telur líklegt að niðurstaða úr atkvæðagreiðslu muni fást milli klukkan níu og tíu í kvöld. Eftir það mun umfjöllun um tillöguna halda áfram fram eftir kvöldi.

Fáist tillagan samþykkt mun hún marka nokkur tímamót, en hingað til hefur Palestína haft stöðu samtaka hjá Sameinuðu Þjóðunum. Verði tillagan samþykkt mun Palestína hins vegar hljóta svipaða stöðu og Páfagarður hefur hjá Sameinuðu Þjóðunum.

Íslendingar eru meðflutningsaðilar að tillögunni og styðja hana að sögn Össurar Skarphéðinssonar, utanríkisráðherra.

Hér má fylgjast með umfjöllun Sameinuðu Þjóðanna og atkvæðagreiðslunni.