Frygðardrykkur og bíómynd á leiðinni

Dominique Strauss-Kahn leitar nú uppreisn æru og endurskilgreiningar á sér sjálfum með aðstoð ráðgjafafyrirtækis, hann kom meðal annars í viðtal við franska blaðið Le Point þar sem hann sagðist hafa staðið í þeirri barnslegu trú að hann gæti lifað lífi sínu eins og hann vildi.

Strauss-Kahn var ekki aðeins framkvæmdastjóri Alþjóðagjaldeyrissjóðsins heldur líklegt efni í forsætisráðherra Frakklands þegar hann var kærður fyrir að nauðga herbergisþernu á hóteli í New York. Í blaðinu New York Times er núverandi staða Strauss-Kahn rakin, en þar kemur fram að þessi fyrrum þungavigtarmaður í alþjóðastjórnmálum líti svo á að lostinn hafi verið glæpavæddur.

Strauss-Kahn hefur ekki átt sjö dagana sæla eftir að þernan kærði hann fyrir nauðgun. Máli hennar var vísað frá dómstólum í New York en hún höfðaði einkamál gegn honum sem enn á eftir að fá niðurstöðu í. Eins var kæru belgískrar vændiskonu dregin til baka, en sú sagði fyrrum framkvæmdastjórann hafa beitt sig miklu ofbeldi og nauðgað sér. Framburður hennar breyttist nokkru síðar, hún sagði þá að kynlífið hafi verið ofbeldisblæti þar sem báðir aðilar tóku þátt af fúsum og frjálsum vilja.

Það breytir því hinsvegar ekki að Strauss-Kahn horfir nú fram á að láta rétta yfir sér vegna tengsla sinna við vændishring sem bauð auðugum mönnum að taka þátt í svallveislum.

Strauss-Kahn var handtekinn vegna málsins, hann sagði þá, eins og frægt er orðið, að hann hafi tekið þátt í veislunum, en ekki vitað að um vændiskonur væri að ræða, þar sem þær voru allar naktar.

Strauss-Kahn hefur áður játað að vera libertanisti (libertine), sem er líklega smekklega leiðin til þess að útskýra að maður sé kynsvallari. Hann segir það ekki ólöglegt.

Strauss-Kahn hefur grátbeðið fjölmiðla að gefa sér svigrúm. Það virðist þó engin vera á þeim buxunum að hlífa svallaranum, enda bæði bók um kynsvallið á leiðinni á markað, sem og kvikmynd þar sem stórleikarinn Gérard Depardieu mun túlka Strauss-Kahn.

Þá hafa einnig ungir frumkvöðlar nýtt sér þörf Strauss-Kahn fyrir stinningarlyfið Viagra og markaðssett áfengan drykk sem frygðarlyf - en nafn drykksins ber skammstöfun fyrrum framkvæmdastjórans, DSK.