Danskur njósnari tók þátt í aftöku eins af leiðtogum al-kaída

Skuggahliðar dönsku leyniþjónustunnar hafa verið mikið í sviðsljósi fjölmiðla þarlendis undanfarna daga. Einn af njósnurum leyniþjónustunnar tók þátt í aftöku á hryðjuverkamanni í Jemen.

Það var bandaríska leyniþjónustan CIA sem hafði fengið skipun frá Barack Obama Bandaríkjaforseta um að taka al-kaída leiðtogann Anwar al-Awlaki af lífi. Danska leyniþjónustan aðstoðaði CIA við aftökuna með því að senda þeim einn af njósnurum sínum, Michael Storm að nafni.

Fyrir utan þátttöku sína í að skipuleggja aftöku Awlaki í Jemen árið 2010 var Storm einnig notaður til þess að koma vestrænni konu í hjónaband með Awlaki svo auðveldara væri að rekja ferðir hans innan Jemen. Í farangri konunnar, sem var frá Króatíu, var sendibúnaður sem gerði CIA kleyft að vita nákvæmlega hvar Awlaki var staddur þegar hann var tekinn af lífi.

Í helgarútgáfu Jyllands Posten er fjallað ítarlega um málið en blaðið hefur m.a. undir höndum símaskilaboð frá yfirmanni Storm um að sé orðinn efnaður maður. Hann fái í sinn hlut 250.000 dollara eða um 30 milljónir kr. fyrir aðstoðina við aftöku Awlaki en bandaríkjastjórn hafði sett háar fjárhæðir Awlaki til höfuðs. Storm mun hafa tekið við dollurunum pökkuðum niður í tösku á Crowne Plaza hótelinu í Kaupmannahöfn.