Reikistjarna á stærð við jörðu fannst í Alpha Centauri kerfinu

Evrópskir stjörnufræðingar hafa fundið reikistjörnu álíka stóra og jörðin, á braut um sól í Alpha Centauri kerfinu sem er nálægasta stjörnukerfi við jörðina.

Þessi reikistjarna er jafnframt sú léttasta sem fundist hefur í kringum stjörnu á borð við sólina, að því er segir í umfjöllun um málið á vefsíðunni eso.org.

Alpha Centauri er ein bjartasta stjarnan á suðurhimninum en stjörnukerfi þetta er í aðeins 4,3 ljósára fjarlægð frá jörðinni. Um þrístirni er að ræða, kerfi tveggja stjarna áþekkum sólinni, sem hringsóla hvor um aðra og nefnast Alpha Centauri A og B, auk fjarlægari og daufari rauðri dvergstjörnu sem kallast Proxima Centauri.

Frá nítjándu öld hafa stjörnufræðingar velt vöngum yfir hugsanlegum reikistjörnum í þessu kerfi, enda er þar um að ræða nálægasta mögulega heimili lífs utan okkar sólkerfis. Þrátt fyrir sífellt nákvæmari leit fannst aldrei neitt, fyrr en nú. Þessi reikistjarna er of nálægt sól sinni til að þar geti þrifist líf. Hinsvegar gefur fundur hennar vísindamönnum auknar vonir um að hægt verði að finna reikistjörnu þar sem líf sé mögulegt í framtíðinni.

Reikistjarnan fannst í gegnum stjörnusjónaukann í La Silla í Chile.