Sveinn Arason: Upphlaup hjá fjárlaganefnd

Ríkisendurskoðandi segir það hreint upphlaup hjá fjárlaganefnd að neita að afhenda honum frumvarp til umsagnar. Hann telur sig enn njóta fulls trausts forseta Alþingis.

Meirihluti fjárlaganefndar Alþingis neitar að láta Ríkisendurskoðun fá fjáraukalagafrumvarpið til umsagnar vegna trúnaðarbrests sem kom upp vegna dráttar á skilum skýrslu í Oracle-málinu svokallaða.

Sveinn Arason, ríkisendurskoðandi, vildi ekki koma í viðtal vegna málsins en sagði í samtali við fréttastofu nú í morgun að hann hefði alls ekki brugðist trausti fjárlaganefndar í vinnu sinni fyrir þá nefnd. Hann bendir á að umræddri skýrslu á að skila til forsætisnefndar en ekki fjárlaganefndar.

Spurður hvort honum sé hreinlega sætt áfram sem ríkisendurskoðandi segir Sveinn að hann líti svo á að meðan hann hafi traust forsætisnefndar sé eðlilegt að hann sitji áfram.

Aðspurður hvort hann hafi fengið staðfest að hann njóti trausts þeirrar nefnda svarar Sveinn því að hann hafi hið minnsta ekki fengið vísbendingar um annað.

Þá bendir hann á að forseti Alþingis hafi sent honum bréf þar sem ríkisendurskoðun er falið að ljúka skýrslunni fyrir októberlok og að þetta bréf sé í raun ígildi yfirlýsingar um að þarna ríki enn traust, þrátt fyrir að þar séu einnig ákúrur vegna dráttar á skilum.

Sveinn segir að ríkisendurskoðun muni skýra fyrir forsætisnefnd og forseta Alþingis af hverju skilin drógust eins og raun ber vitni. Hann segir að þetta séu skýringar sem hann skuldi þeim og engum öðrum, og að það sé hreint upphlaup hjá fjárlaganefnd að „eigna sér" þetta mál, eins og Sveinn orðar það.

Þrátt fyrir ítrekaðar tilraunir hefur ekki náðst tal af Ástu Ragnheiði Jóhannesdóttur, forseta Alþingis, vegna málsins.

Ragnheiður Ríkharðsdóttir, fyrsti varaforseti Alþingis og þingmaður Sjálfstæðisflokks, segist ekkert hafa heyrt frá forseta þingsins um fyrirhugaðan fund nefndarinnar vegna trúnaðarbrestsins. Nú er svokölluð kjördæmavika og næsti fundur nefndarinnar því ekki fyrr en á mánudag eftir viku. Hún segir að sér finnist beinlínis „kjánalegt" ef ekki verður fundað fyrr.