Ný uppgötvuð halastjarna gæti orðið sú bjartasta í sögunni

Það voru rússneskir stjörnufræðingar sem uppgötvuðu halastjörnuna í síðastliðnum mánuði. Í kjölfarið hlaut hún nafnið 2012 S1. Hún var þá í um 90 milljón kílómetra fjarlægð frá Jörðinni eða mitt á milli Satúrnús og Júpíter.

Þegar aðdráttarafl Sólar eykst hrynja ís- og rykagnir af halastjörnunni. Í kjölfarið myndast gríðarlega langur hali sem vísindamenn telja að muni lýsa upp næturhimininn hér á jörðu niðri.

Í samtali við National Geographic sagði Raminder Samra hjá Geimvísindastofnun Kanada að halastjarnan komi til með að þjóta framhjá Jörðinni á vetrarmánuðum næsta árs eða snemma árið tvö þúsund og fjórtán.

Hann sagði að halastjarnan muni að öllum líkindum verða margfalt bjartari en tunglið sjálft. Þá er möguleiki á að halastjarnan verði sú bjartasta sem heilsað hafi jörðinni í gegnum tíðina.

Samra tekur þó fram að halastjörnur eru afar óútreiknanleg fyrirbæri. Lengi vel hafa vísindamenn ekki reynst sannspáir þegar kemur að því að áætla komu og birtu halastjarna.