Bráðnun Norðurpólsíssins ávísun á afbrigðilegt og verra veðurfar

Vísindamenn við Norsku heimsskautastofnunina hafa miklar áhyggjur af aukinni bráðnun íssins á Norðurpólnum. Þeir telja bráðnunina ávísun á afbrigðilegt og verra veðurfar í heiminum.

Þetta kemur fram í ítarlegri umfjöllun á vefsíðu Verdens Gang um málið. Þar segir Nalan Koc yfirmaður rannsóknardeildar stofnunarinnar að breytingarnar á ísnum á Norðurpólnum séu mun meiri en nokkrar spár gerðu ráð fyrir í fortíðinni.

Íshellan hefur minnkað um 20% á fimm árum og bráðnunin hefur færst verulega í aukanna í sumar. Í ágústmánuði bráðnuðu yfir 90.000 ferkílómetrar á dag af ísnum og það er að minnsta kosti vika þar til sú þróun stöðvast. Íshellan er orðin nær helmingi minni en hún var árið 1979.

Koc segir að afbrigðilegt veðurfar eins og miklir þurrkar í Bandaríkjunum og aukin tíðni fellibylja eins og Ísaks megi sennilega rekja til bráðnunar á Norðurpólsísnum. Hann nefnir að júlímánuður í Bandaríkjunum hafi verið sá heitasti síðan mælingar hófust.

Alvarleg keðjuverkun sé hafin. Í stað þess að geislar sólarinnar endurkastist af ísnum hiti þeir yfirborð hafsins. Því meir sem ísinn bráðnar því meir nær sólin að hita hafið og þar með einnig andrúmsloft jarðarinnar. Þetta muni að lokum hækka yfirborð sjávar við strendur Norður Atlantshafsins og setja dýralíf við þær úr skorðum.

Hér má bæta við að landsbyggðin á Bretlandseyjum er talin hafa tapað um milljarði punda eða nær 200 milljörðum króna vegna þess hve veðurfarið á Bretlandseyjum var afleitt í sumar. Það voru helst bændur og ferðamannaþjónustan sem urðu fyrir barðinu á veðurfarinu.