Valdabaráttunni í Kína virðist hvergi nærri lokið

Miklar vangaveltur eru nú í Kína um að valdabaráttunni innan kínverska kommúnistaflokksins sé hvergi nærri lokið og því enn ekki ljóst hver tekur við forsetaembætti landsins af Hu Jintao.

Allir reiknuðu með að varaforsetinn Xi Jinping myndi taka við forsetaembættinu af Jintao á árlegu flokksþingi Kommúnistaflokksins í næsta mánuði. Jinping virðist hinsvegar vera horfinn af yfirborði jarðar.

Í frétt um málið á vefsíðu BBC segir að í gærdag hafi hann aflýst boðuðum fundi með Helle Thorning Schmidt forsætisráðherra Dana sem er í opinberri heimsókn í Kína. Síðasta föstudag lét hann ekki sjá sig á mikilvægum flokksfundi og á miðvikudaginn í síðustu viku aflýsti hann fundi með Hillary Clinton utanríkisráðherra Bandaríkjanna með nær engum fyrirvara.

Þar að auki lét hann hvorki sjá sig á boðuðum fundi með forsætisráðherra Singapore né fundi með rússneskum embættismönnum í síðustu viku.

Á blaðamannafundi sem kínverska utanríkisráðuneytið hélt í gærdag sagðist talsmaður ráðuneytisins ekki geta gefið neinar upplýsingar um Jinping og fjarveru hans.