Kate og William íhuga málsókn vegna nektarmyndanna

Hjónin Kate Middleton og William Bretaprins eru nú að íhuga málsókn gegn franska tímaritinu Closer sem birt hefur myndir af Kate berri að ofan.

Breska konungsfjölskyldan er æf af reiði yfir þessum myndum og haft er eftir þeim Kate og William að þau séu bæði sorgmædd og vonsvikin vegna myndbirtingarinnar.

Í umfjöllun blaðsins Daily Mail segi að þau hjónin myndu að öllum líkindum vinna málið gegn tímaritinu þar sem Frakkland býr yfir einni ströngustu löggjöf um persónuvernd sem þekkt er í heiminum. Myndirnar munu hafa verið teknar á einkalóð það er sveitasetri Lord Linley í Frakklandi.

Þá hafa borist fregnir um að myndirnar hafi verið boðnar breskum fjölmiðlum til sölu en þeir hafi allir hafnað því að kaupa þær.