Vinnuálag eykur líkur á hjartasjúkdómum

Breskir vísindamenn komust að því með víðtækri rannsókn að vinnuálag eykur líkur á hjartaáföllum og hjartasjúkdómum um 23%. Rannsóknin náði til 200 þúsund einstaklinga en frá henni er greint á fréttavef BBC.

Rannsóknin bendir til þess að fólk í störfum þar sem litla sérhæfingu þarf til sé líklegra til að láta vinnuálagið hafa áhrif á sig. Þannig er læknir í minni hættu en starfsmaður við færiband í verksmiðju þó álag á báðum sé talsvert.

Fyrri rannsóknir á þessu sviði gáfu misvísandi upplýsingar um hvort vinnuálag hefði áhrif á hjartaheilsu fólks. Þessi nýjasta rannsókn er byggð á 13 minni rannsóknum og benti til ákveðinna tengsla.

Vísindamennirnir tóku fram að þó álagið hefði áhrif hefðu til dæmis reykingar og óheilbrigt líferni margfalt skaðlegri áhrif á hjartaheilsu fólks. Því er hægt að minnka áhættuna talsvert þó maður sé í krefjandi starfi með því einu að stunda líkamsrækt, reykja ekki og borða hollan mat.