Sá aðeins einn skotmann

Franska lögreglan er búin að taka skýrslu af sjö ára gamalli stúlku sem komst lífs af ásamt fjögurra ára gamalli systur sinni þegar fjölskylda þeirra var myrt með köldu blóði í frönsku ölpunum fyrir um einni og hálfri viku síðan.

Samkvæmt fréttavef Daily Telegraph segist stúlkan aðeins hafa séð einn skotmann. Stúlkan særðist lífshættulega þegar hún fékk skot í öxlina en hún lá meðvitundarlaus á spítala þar til fyrr í vikunni. Þegar hefur verið tekin skýrsla af fjögurra ára systur hennar, sem fannst lifandi undir pilsfaldi móður sinnar daginn eftir árásina.

Þá staðfesti franska lögreglan að verið væri að leita að dökkum Mitsubishi Pajero jeppa með dökkum rúðum sem sást sama kvöld í grennd við morðvettvanginn. Morðingjans er enn leitað.