Handritshöfundur „sakleysi múslima“ kom vopnaður til dyra

Kvikmyndagerðarmaðurinn Nakoula Basseley Nakoula, mætti til yfirheyrslu hjá lögreglunni í heimabæ sínum Cerritos í Kaliforníu fyrr í dag.

Nakoula gerði kvikmyndina Innoncence of muslims, eða sakleysi múslima, en myndin hefur meðal annars orðið til þess að ráðist hefur verið á sendiráðið í Líbíu, þar sem sendiherra Bandaríkjanna lét lífið ásamt fleirum, og á herstöð í Afganistan. Al Kaída og Talibanar hafa hvatt til frekari árása.

Samkvæmt fréttavef AP gaf Nakoula sig fram á lögreglustöðina í morgun en hann var klæddur í síðan frakka, með húfu og sólgleraugu svo hann þekktist ekki.

Hann snéri ekki aftur á heimili sitt þar sem meira eða minna allir fjölmiðlar Bandaríkjanna bíða hans.

Nakoula er á fimm ára skilorði eftir að hann varð uppvís af fjársvikum fyrir tveimur árum síðan. Meðal takmarkana skilorðsins er að hann noti ekki tölvur eða veraldarvefinn. Rjúfi hann skilorð þarf hann að afplána fimm ára refsingu.

Kvikmyndin, sem er vægast sagt gerð af vanefnum, virðist hafa verið tekin upp í húsnæði í eigu kristilegra samtaka.

Handritshöfundur hennar, Steven Klein, virðist vera í töluverðu uppnámi vegna viðtaka myndarinnar, en AP greinir frá því að blaðamaður á vegum blaðsins Press-Enterprise hafi bankað upp á hjá honum í því skyni að taka viðtal við hann. Klein kom til dyranna aðeins klæddur í hvítar nærbuxur með blekblettum á og hann hélt á skammbyssu í hendinni. Blaðamaður lýsir samskiptum þeirra þannig að Klein hafi verið pirraður, sveiflað byssunni, og haldið því fram að hann ætlaði að verja málfrelsið fram í rauðan dauðann.

Hann játaði þó fyrir blaðamanninum að hann væri orðinn verulega þreyttur.