Einkaskjalasafn nasistans Joseph Goebbels á uppboð

Einkaskjalasafn nasistans Joseph Goebbels verður selt á uppboði í Connecticut í Bandaríkjunum í vikunni.

Goebbels var áróðursmálaráðherra nasista á valdatíma þeirra í Þýskalandi en einkaskjalasafn þetta nær yfir tímabilið frá því að Goebbles var unglingur og fram að valdatöku nasista á millistríðsárunum.

Í þessu safni er að finna mikinn fjölda skjala, þar á meðal ljóð, leikrit, ritgerðir og ástarbréf frá Else Janke til Goebbels en Janke var Gyðingur.

Í umfjöllun Ekstra Bladet um málið segir að það sé uppboðshúsið Alexander Autographs sem býður safnið til sölu en það uppboðshús sérhæfir sig í sölu á sjaldgæfum sögulegum skjölum. Talsmaður uppboðshússins segir að Goebbels skjölin veiti einstæða innsýn í hugarheims þessa alræmda nasista.

Goebbels var áróðursráðherra nasista frá árinu 1933 til 1945. Hann og eiginkona hans frömdu sjálfsmorð í Byrginu svokallaða í Berlín þann 1. maí 1945 eftir að hafa myrt börnin sín sex með eitri.