Suu Kyi til Bandaríkjanna

Friðarverðlaunahafinn og stjórnarandstöðuleiðtoginn frá Búrma, Aung San Suu Kyi, lagði í dag af stað í sína fyrstu heimsókn til Bandaríkjanna síðan hún var vistuð í stofufangelsi árið 1990. Í Bandaríkjunum mun hún taka við æðstu heiðursverðlaunum sem Bandaríkjaþingið getur veitt.

Suu Kyi mun ferðast í 18 daga um Bandaríkin og funda með ýmsum stjórnarmönnum landsins. Ferðina ber upp á sama tíma og ríkisstjórn Obama veltir fyrir sér að afnema innflutningsbann af vörum frá Myanmar/Búrma, en töluverðar umbætur hafa átt sér stað í landinu að undanförnu.

Suu Kyi er talskona friðar og mannréttinda og nánast tilbeðin í heimalandi sínu. Henni var sleppt úr stofufangelsi árið 2010 eftir að hafa setið þar tuttugu ár. Frá árinu 1989 hefur hún verið í ferðabanni og ekkert farið út fyrir Búrma. Í sumar fór hún í fyrstu ferðalögin út fyrir Búrma í áratugi og tók meðal annars við friðarverðlaunum Nóbels sem hún hlaut árið 1991.

Aljazeera greinir frá.