Grindhvölum bjargað af skoskri strönd

Mikill fjöldi fólks fylgdist með björgun grindhvala við austurströnd Skotlands í gærdag.

Grindhvalavaða synti þar á land en áður en björgunarmenn komu í fjöruna höfðu 16 af hvölunum drepist, þar af þrír kálfar. Hinsvegar tókst að bjarga 10 af hvölunum úr fjörunni.

Vakt var við fjöruna í alla nótt til að sjá hvort einhverjir af hvölunum myndu synda á land að nýju.

Í frétt um málið á BBC segir að svo mikil ásókn hafi verið af fólki í fjöruna til að skoða hvalina að það truflaði björgunarstörfin um tíma.