Draugaskip vekur athygli í Bandaríkjunum

Brakið úr gömlu strönduðu skipi undan strönd Alabama í Bandaríkjunum hefur vakið töluverða athygli en Bandaríkjamenn kalla þetta skip núna draugaskipið.

Það sem hefur vakið athygli Bandaríkjamanna er að þetta skipsbrak hefur nú rekið á land í þrjú skipti. Í öllum tilvikum hefur brakið komið úr kafinu í kjölfar þess að fellibylur með nafn sem hefst á bókstafnum I hefur gengið yfir ströndina þar sem það strandaði upphaflega.

Brakið rak fyrst á land árið 2004 þegar fellibylurinn Ivan herjaði á ströndina. Næst kom það í ljós árið 2008 þegar fellibylurinn Ike fór þarna um og nú er brakið komið upp á ströndina að nýju í kjölfar fellibylsins Ísaks.

Sérfræðingar eru ekki á einu máli um af hvaða skipi þetta brak er en það er byggt úr tré og er 45 metra langt og 9 metra breitt.

Tvennt kemur helst til greina. Annarsvegar að hér sé um gamalt gufuskip að ræða frá tímum borgarastríðsins í Bandaríkjunum á seinni hluta 19. aldar. Og hinsvegar að um sé að ræða skonnortu sem notuð var til að smygla áfengi til Bandaríkjanna á bannárunum milli 1920 og 1933.