Vírus sem drepur krabbamein - Lækning sett á ís

Ódýr og fljótvirk meðferð við krabbameini er nú geymd í frystikistu sænska erfðafræðingsins Magnus Essand í háskólasjúkrahúsinu í Uppsölum. Tilraunir á músum hafa gengið vonum framar. Því miður er ólíklegt að rannsóknir á mönnum hefjist á næstu árum.

Þó svo að aðferð Essand sé ekki ný af nálinni þykja tilraunir hans byltingarkenndar. Essand hefur nefnilega þróað veiru sem drepur krabbameinsfrumur en meðferðin hentar sérstaklega vel við meðhöndlun taugainnkirtlaæxla. Slíkt krabbamein dró frumkvöðulinn Steve Jobs til dauða.

Vísindamennirnir hafa unnið með adenóveiru af sermigerð 5 sem er „tiltölulega algeng veira" samkvæmt Essand. Með því að skipta út erfðamörkum og bæta inn nýjum hefur Essand nú þróað nýja tegund veiru sem ræðst á krabbameinsfrumur.

„Niðurstöður okkar í tilraunastofunni eru með ólíkindum," segir Essand. Hann áréttar þó að veiran sé hreint ekki dregin úr tómarúmi og það sé alls kostar óvíst hvort að tilraunir á mönnum muni ganga jafn vel og á músum. „Við höfum séð æxli hreinlega bráðna og verða að engu," segir Essand.

Hann bendir á að aukaverkanir meðferðarinnar séu dæmigerðar fyrir veiruna, eða hefðbundin flensueinkenni.

Fjármagn vantar nú til að halda rannsóknum áfram. Nú þegar er verkefni Essands styrkt af krabbameinssamtökum í Svíþjóð en hann hefur notið aðstoðar frá kollegum sínum í Hollandi.

Hægt er að nálgast ítarlegt viðtal við Magnus Essand hér. Þá má einnig finna upplýsingar um rannsóknir hans á vefsvæði háskólans í Uppsölum.