Mikil umræða um "Bermúda þríhyrning" í Englandi

Mikil umræða hefur skapast í Englandi um að þar sé til staðar svæði sem svipar til Bermúda þríhyrningsins svokallaða.

Ástæðan fyrir þessari umræðu er að á skömmum tíma hafa fleiri hundruð bréfdúfur horfið sporlaust í norðurhluta landsins. Nýjasta dæmið kom upp í stórri keppni eigenda bréfdúfna í Norður Yorkshire um síðustu helgi. Þar flugu yfir 200 dúfur af stað en keppt var um hver þeirra kæmi fyrst á áfangastað í skoska landamærabænum Galashiels. Aðeins 13 af þessum dúfum náðu til Skotlands og ekkert hefur spurst til hinna.

Í frétt um málið í Daily Mail segir að þetta bréfdúfuhvarf komi í kjölfar þess að í svipuðu kappflugi bréfdúfna milli Wetherby og Newcastle hafi nærri 200 dúfur einnig horfið sporlaust. Fleiri fréttir um dularfullt hvarf bréfdúfna á þessu svæði hafa birst í breskum fjölmiðlum.

Þeir sem rækta bréfdúfur hafa engar skýringar á hvarfi fugla sinna. Ekki skortir þó kenningar hjá öðrum. Þær eru allt frá því að dúfurnar hafi einfaldlega villst og upp í að bylgjur frá stórri ratsjárstöð breska flughersins hafi eyðilagt ratvísi dúfnanna.

Bermúda þríhyrningurinn er þekkt eða raunar alræmt hafsvæði við Bermúdaeyjar í vestanverðu Atlantshafinu. Þar hefur óvenjumikill fjöldi af skipum og flugvélum horfið sporlaust á undanförnum áratugum.