FBI sakað um að njósna um viðskiptavini Apple

Alríkislögreglan í Bandaríkjunum þvertekur fyrir að hafa njósnað um viðskiptavini Apple. Tölvuþrjótar birtu í gær notendanöfn og persónuupplýsingar rúmlega milljón Apple-notenda. Hópurinn heldur því fram að upplýsingarnar hafi verið teknar af fartölvu sem útsendari FBI notaði til að fylgjast með viðskiptavinum fyrirtækisins.

Svo virðist sem að upplýsingarnar hafi verið í formi UDID-kóða en slíka kóða má finna á öllum Apple-raftækjum.

Litlar upplýsingar hafa borist frá alríkislögreglunni um málið. Stofnunin heldur því fram að upplýsingastuldurinn hafi í raun aldrei átt sér stað. Þá hefur því verið harðlega neitað að útsendarar fylgist með viðskiptavinum Apple.