Árásarmennirnir völdu Sigrid af handahófi

Ekki er talið að nein tengsl hafi verið á milli hinnar sextán ára gömlu norsku Sigridar Schjetne og mannanna tveggja sem grunaðir eru um að hafa orðið henni að bana. Stúlkunnar hafði verið leitað í mánuð áður en hún fannst látin í fyrrakvöld. Norska lögreglan sagði á blaðamannafundi í dag að unnið væri eftir fjölmörgum tilgátum. Sú helsta væri að mennirnir hefðu valið fórnarlamb sitt af handahófi.

Hanne Kristin Rohde, yfirmaður í ofbeldisbrotadeild lögreglunnar í Osló, segir að rannsókn málsins gjörbreytist nú þegar líkið er fundin eftir að stúlkunnar hafi verið leitað í fjórar vikur. Ýmsar vísbendingar hafi borist. „Við getum ekki gefið upp smáatriði, það myndi eyðileggja rannsóknina," segir Rohde.