Auðkýfingur vill lægri laun í Ástralíu

Hin ástralska Gina Rinehart, ein ríkasta kona veraldar, hefur valdið miklu fjaðrafoki í heimalandi sínu. Hún sagði á dögunum að Ástralíu væri of dýrt land og að Ástralar væru almennt séð duglausir. Þá fór hún einnig fram á að laun yrðu lækkuð í landinu.

Rinehart lét ummælin falla á fundi námufyrirtækja í Sidney í vikunni. Þar sagði hún að verkamenn í Afríku væru bæði vinnufúsir og reiðubúnir að vinna fyrir lægra kaup eða tvo dollara á dag. Það samsvarar 247 íslenskum krónum.

Þá hvatti hún landa sína til að draga úr áfengisdrykkju og reykingum og nýta þess í stað tíma sinn til að vinna. Rinehart vakti síðan athygli á því að kolefnisskattur í landinu gerði fyrirtæki hennar erfitt fyrir.

Julia Gillard, forsætisráðherra Ástralíu, hefur gagnrýnt Rinehart harðlega fyrir ummælin. Hún sagði að það væri ekki í anda ástralsks samfélags að „henda nokkrum dollurum í fólk og biðja það um að vinna. Vinnandi fólk á skilið góð laun og almennilegar vinnuaðstæður," sagði Gillard.

Rinehart er eigandi námufyrirtækisins Hancock Prospecting. Samkvæmt Forbes eru auðævi hennar metin á rúmlega 2.224 milljarða íslenskra króna.